४४ औं जन्मदिन मनाउँदै क्याप्टेन कूल

रंग नेपाल २०८२ असार २३ मा प्रकाशित

काठमाडौं । भारतीय क्रिकेट टोलीका पूर्वकप्तान महेन्द्र सिंह धोनीले आज ४४ औं जन्मदिन मनाउँदैछन् ।

धोनीलाई क्रिकेट इतिहासको सबैभन्दा सफल कप्तान र विकेटकिपर मध्ये एक मानिन्छ । हरेक वर्ष जस्तै यस पटक पनि धोनीको जन्मदिनलाई लिएर उनका फ्यानहरूमा उत्साह छ । उनका फ्यानहरुले उनको जन्मदिन हरेक वर्ष विशेष तरिकाले मनाउँदै आएका छन् ।

क्याप्टेन कूलको नामले परिचित धोनीको जन्म ७ जुलाई १९८१ मा भारतको बिहार (अहिले झारखण्ड)को राँचीमा भएको थियो ।

धोनीको कप्तानीमा भारतले तीन प्रमुख आईसीसी ट्रफी जितेको छ । उनको कप्तानीमा भारतले २००७ को आईसीसी टी–२० विश्वकप, २०११ को एकदिवसीय क्रिकेट विश्वकप र २०१३ को आईसीसी च्याम्पियन्स ट्रफी जितेको हो ।

यस्तै, धोनीकै कप्तानीमा भारत सन् २००९ मा पहिलो पटक टेस्टमा नम्बर १ बनेको थियो ।

धोनीले आईपीएलमा पनि उत्कृष्ट प्रदर्शन गरिरहेका छन् र आफ्नो कप्तानीमा चेन्नई सुपर किंग्सका लागि ५ ट्रफी जितेका छन् ।

धोनीले २३ डिसेम्बर २००४ मा बंगलादेश विरुद्धको एकदिवसीय खेलबाट आफ्नो अन्तर्राष्ट्रिय करियर सुरु गरेका थिए । धोनीलाई २००७ मा भारतको टी–२० कप्तान बनाइएको थियो । धोनीले आफ्नो कप्तानीमा २००७ मा भारतलाई टी–२० विश्वकपको उपाधि जिताएका थिए । यसपछि धोनीले कहिल्यै पछाडि फर्केर हेर्नु परेन । धोनीले २००८ मा पूर्णकालीन कप्तानको जिम्मेवारी सम्हालेका थिए ।

डिसेम्बर २०१४ मा धोनीले अचानक टेस्ट क्रिकेटबाट सन्यासको घोषणा गरे । यसबाहेक धोनीले २०१७ को सुरुमा एकदिवसीय र टी–२० कप्तानीलाई पनि बिदाइ गरे ।

अगस्ट २०२० मा महेन्द्र सिंह धोनीले अन्तर्राष्ट्रिय क्रिकेटबाट सन्यासको घोषणा गरे । धोनीलाई अन्तिम पटक २०१९ को विश्वकपको समयमा अन्तर्राष्ट्रिय क्रिकेट खेलेको देखिएको थियो । यद्यपि, धोनी अझै पनि आईपीएलमा चेन्नई सुपर किंग्सबाट खेलिरहेका छन् ।

धेरै पढिएका

पछिल्ला अपडेट