भारतीय अभिनेत्री शबाना आजमी नेपाल आउँदै
रंग नेपाल
२०७९ कार्तिक २७ मा प्रकाशित
काठमाडौं । भारतकी सुप्रशिद्ध रङ्गकर्मी तथा अभिनेत्री शबाना आजमी नेपाल आउने भएकी छिन् ।
दोस्रो नेपाल अन्तर्राष्ट्रिय नाट्य महोत्सव २०७९ (निटफेस्ट २०२२) मा विशेष अतिथिको रूपमा सहभागी हुन उनी काठमाडौं आउन लागेकी हुन् ।
आगामी मंसिर ९ गते सुरु हुने महोत्सवको उदघाटनमा विशेष अतिथिको रूपमा आयोजक मण्डला थिएटरले रङ्गमञ्च र चलचित्रमा सुप्रशिद्ध अभिनेत्री आजमीलाई आमन्त्रण गरेको हो ।
‘सामाजिक रूपान्तरणका लागि रङ्गमञ्च : विविधिताको उत्सव’ नाराका साथ हुन लागेको महोत्सवमा उनले नेपाली रङ्गकर्मी तथा कलाकारहरूलाई ‘मास्टरक्लास’ पनि दिने महोत्सवकी निर्देशक सिर्जना सुब्बाले जानकारी दिइन् ।
मास्टरक्लास महोत्सवको दोस्रो दिन मंसिर १० गते साँझ ७:३० बजे मण्डला थिएटरको मुख्य हलमा हुनेछ ।
साथै अभिनेत्री शबाना आजमीले महोत्सवले आह्वान गरेको ‘इनोभेटभि आइडिया अवार्ड’का लागि आवेदन परेकामध्ये एक अवधारणालाई आयोजकको तर्फबाट पुरस्कृत पनि गर्ने महोत्सवकी संयोजक विजया कार्कीले बताइन् ।
