नीताको फिल्म ‘सुख दुःख’मा मिथिला शर्मा अनुबन्धित

काठमाडौं । अभिनेत्री तथा निर्मात्री नीता ढुंगाना अधिकारीले निर्देशन गर्ने फिल्म ‘सुख दुःख’मा मिथिला शर्मा अनुबन्ध भएकी छन् । उनलाई निर्देशक तथा निर्मात्री समेत रहेकी अधिकारीले फिल्मका लागि अनुबन्ध गरेकी हुन् । आइतबार निर्माण पक्ष र अभिनेत्री शर्माबीच कागजी सम्झौता भएको हो ।

अभिनेत्री शर्मालाई अनुबन्ध गर्दै नीताले भनिन्, ‘चलचित्र सुख दुःखमा मिथिला शर्मालाई सहभागी गराउन पाउँदा धेरै नै उत्साहित छौँ । सायद हजुरबिना यो चलचित्र अपुरो हुन्थ्यो । अब पूर्ण हुने बाटोमा जाँदैछ ।’

यसअघि यो फिल्मका लागि चर्चित भारतीय छायाकार कवीरलाल र शाहिदलाल डिओपीका लागि अनुबन्ध भएका थिए । उनीहरु बाहेक यो फिल्मको मुख्य कलाकार को रहने हुन् निर्माण पक्षले खुलाएको छैन । नीताले मुख्य कलाकारको बारेमा केही सातापछि जानकारी दिने बताइन् ।

नीता ढुंगानाको डेब्यु निर्देशन रहने फिल्ममा फिल्मको निर्माण व्यवस्थापनको जिम्मा शंकर पाण्डेलाई दिइएको छ । निर्देशक ढुंगानाले अन्य कलाकारहरुको बारेमा जानकारी सार्वजनिक गरेकी छैनन् ।

‘नीता फिल्म्स’को ब्यानरमा बन्न लागेको यो फिल्म आगामी वर्ष दसैंको फूलपातीका अवसरमा प्रदर्शनमा ल्याउने योजना निर्माण पक्षको छ । यो फिल्मको वितरण अधिकार उपत्यकाबाहिर एफडी कम्पनीले लिएको छ भने उपत्यकाभित्र रिच इन्टरटेनमेन्टले पाएको छ ।

सम्बन्धित समाचार

‘सुम्निमा’मा अडिसनबाट चयन भए अनिकेत पाख्रिन

‘निःशब्द’को फस्टलुक पोस्टर सार्वजनिक

चलचित्र ‘ताराहरू’ को दोस्रो गीत ‘ऐया नि हो’ सार्वजनिक (भिडिओसहित)

‘कोशोढुङ्गा’को गीत ‘नत्र भने जिन्दगी व्यर्थ छ’ सार्वजनिक