‘नृत्य नेपाली पारा’को दोस्रो संस्करणको घोषणा

काठमाडौं । ‘नृत्य नेपाली पारा’को दोस्रो संस्करणको घोषणा गरिएको छ । आइतबार काठमाडौंमा आयोजित एक कार्यक्रमबीच प्रतियोगिताको औपचारिक घोषणा गरिएको हो ।

आयोजक संस्था नेपाल लोक नृत्य सेन्टरका अध्यक्ष केशव कोइरालाका अनुसार प्रतियोगिता दुई तहमा सञ्चालन हुनेछ । जुनियर समूहमा कक्षा २ देखि ५ सम्मका विद्यार्थी र सिनियरमा समूहमा कक्षा ६ देखि १० सम्मका विद्यार्थीले प्रतिस्पर्धा गर्नेछन् । प्रतियोगितालाई नृत्य नेपाल संघले सहकार्य गरेको छ ।

प्रतियोगिताको मुख्य निर्णयकमा शम्भु शाही छन् भने अन्य निर्णयकमा अनिता गोले तामाङ, रमेश बुढाथोकी, कृष्ण रसाल रहेका छन् । अडिसन राउण्डबाट छनोट भएका दुईवटै क्याटेगोरीका विद्यार्थीलाई नृत्य कार्यशाला (वर्कसप) गराइनेछ । जसको प्रशिक्षकमा दक्षिणा लामा दावा, सरोज श्रेष्ठ र अभि वाग्ले छन् । प्रतियोगिताको वर्कसप दस्तुर तीन हजार ५०० रुपैयाँ तोकिएको छ । आवेदन फारम दर्ता शुल्क ५०० रुपैयाँ रहनेछ । वर्कसपपछि सहभागीको फोटोशुट पनि गरिने आयोजकले जनाएको छ । प्रतियोगितामा सहभागी विद्यार्थीले आवश्यक सामग्री स्वयं व्यवस्था गर्नुपर्नेछ । उनीहरूले नेपाली गीतमा मात्र प्रस्तुति दिन पाउनेछन् ।

प्रतियोगिताका प्रथम विजेताले २० हजार रुपैयाँ, दोस्रोले १० हजार, तेस्रोले सात हजार, चौथोले पाँच हजार र पाँचौं पुरस्कारस्वरूप पाँच हजार रुपैयाँसहित ट्रफी, मेडल र प्रमाणपत्र प्रदान गरिनेछ । यसको साथै उत्कृष्ट हाउभाउ, भेषभूषा, मौलिकता, दर्शकको रोजाइ र उत्कृष्ट प्रस्तुति गरी पाँच विशेष विधामा पनि ट्रफी, मेडल र प्रमाणपत्रसहित सम्मान गरिने जनाइएको छ । आयोजकले ‘नृत्य नेपाली पारा’लाई बालबालिकाको प्रतिभा अभिव्यक्तिको मञ्चका रूपमा प्रभावकारी रूपमा अघि ल्याइने विश्वास व्यक्त गरेका छन् ।

सम्बन्धित समाचार

‘पीआर’को टाइटल गीत ‘पीआरको चक्करले’ सार्वजनिक

एसिया प्यासिफिक फिल्म महोत्सवमा ‘आँखा’ बन्यो उत्कृष्ट

समीक्षा र अशोकको स्वर रहेको ‘आयो दशैं’ सार्वजनिक

अनुज लामाको गीत ‘टाढा नजाउ’ सार्वजनिक