महाकवि देवकोटाको गजलको श्रव्यदृश्य सार्वजनिक

काठमाडौं, १३ माघ । महाकवि लक्ष्मीप्रसाद देवकोटाले रचना गरेको गजलको श्रव्यदृश्य सार्वजनिक गरिएको छ ।

मैतीदेवीमा रहेको देवकोटा सङ्ग्रहालयमा शुक्रबार आयोजित कार्यक्रममा प्रा.डा. कृष्णहरि बरालले उक्त गजलको श्रव्यदृश्य सार्वजनिक गरे । महाकावि देवकोटाको नाटक ‘सावित्री सत्यवान’ मा रहेको ‘आकाशमा शशी छन्’ गजललाई गायक सन्तोष श्रेष्ठको स्वरमा बजारमा ल्याइएको हो ।

प्रा.डा. बरालले आफूले विद्यावारिधि गर्ने क्रममा फेला पारेको देवकोटाको उक्त गजल श्रेष्ठले रेकर्ड गरेर सार्वजनिक गरेकामा खुसी व्यक्त गरे । अरबदेखि भारत हुँदै नेपाल छिरेको गजलले नयाँ बाटो बनाउँदै गएको उल्लेख गर्दै उनले महाकवि देवकोटाको कृतिबारे चर्चा गरे ।

समालोचक घनेन्द्र ओझाले गजलमाथि टिप्पणी गर्दै महाकवि देवकोटाले गजल भनेर रचना नगरे पनि उक्त रचना गजलको संरचनामा रहेको बताए । झण्डै एक सय वर्षअघि लेखिएको देवकोटाको गजल पूर्णतः शास्त्रीय संरचनामा रहेको उल्लेख गर्दै उनले महाकविको गजल रेकर्ड भएर आउनु समग्र गजल प्रेमीका लागि खुसीको कुरा भएको बताए  ।

महाकवि देवकोटाका छोरा प्रा.डा. पद्मप्रसाद देवकोटाले आफ्ना पिताको सृजनालाई सङ्गीतबद्ध र स्वरबद्ध गरेर बाहिर ल्याएकामा खुसी व्यक्त गरे । कार्यक्रममा महाकवि देवकोटाकी छोरी अम्बिकादेवी रिमालको समेत उपस्थिति थियो । हेम प्रभास अधिकारीको निर्देशन तथा वीरेन्द्र भाट ‘विपीन’को छायाङ्कन र सम्पादन गरेको श्रव्यदृश्यमा श्रेष्ठ स्वयंले अभिनय गरेका छन् ।

सम्बन्धित समाचार

छैटौँ सातामा ‘महजात्रा’: ५१ औँ दिनतर्फ लम्किँदै

‘फर्की फर्की’को विदेश वितरण अधिकार धमाधम बिक्री

एकैदिन तोलामा २७ सय घट्यो सुनको मूल्य

ग्रामीण चलचित्र महोत्सवमा दयाहाङ र दयाहाङ उत्कृष्ट